पिंपळवंडी -( दि ४) प्रतिनिधी
मोटारसायकलवरुन जात असलेल्या तरुणावर बिबट्याने हल्ला केल्यामुळे हा तरुण जखमी झाला आहे ही घटना रविवारी ( दि ४) रात्री आठ वाजण्याच्या सुमारास कांदळी येथे घडली असून या घटनेत मंगेश रामदास गुंजाळ ( वय २६ रा कांदळी ता जुन्नर जि.पुणे) हा तरूण गंभीर जखमी झाला आहे
याबाबत मिळालेली माहिती अशी की मंगेश हा कांदळी येथील सुतारठिके वस्तीत दुध घालण्यासाठी मोटारसायकल वरुन जात असताना रस्त्याच्या बाजूला दबा धरून बसलेल्या बिबट्याने अचानकपणे मोटारसायकलवर उडी मारली व मंगेश मोटारसायकल घेऊन खाली पडला याचवेळी संतोष गुंजाळ व अक्षय महाले हे दोघेजण मंगेश याच्या पाठीमागून मोटारसायकलवर येत होते मंगेश याच्यावर बिबट्याचा हल्ला होत असल्याचे दिसताच त्यांनी आरडाओरडा केला व त्यानंतर बिबट्याने तेथून पळ काढला या घटनेत मंगेश हा जखमी झाला असून त्याच्यावर आळेफाटा येथील एका खाजगी रुग्णालयात उपचार सुरु आहेत
*************************************
वनखात्याला वारंवार घडणाऱ्या घटनांचे गांभीर्य नाही का?
जुन्नर तालुका हा बिबटप्रणवक्षेत्र असलेला तालुका आहे तालुक्यात बिबट्यांचा मोठ्या प्रमाणात वावर बिबट्यांची संख्या हा संशोधनाचा विषय असून बिबट्याकडून सातत्याने पाळीव प्राण्यांवर व माणसांवर हल्ले होत आहेत आळे येथील एका बालकावर हल्ला करुन या बालकाला ठार केले होते या घटनेला काही महिनेच झाले आहेत त्यानंतर रविवारी पुन्हा कांदळी येथील तरुणावर हल्ला झाला अशा घटना घडल्यानंतर वनखाते यावर काही ठोस उपाययोजना करण्याऐवजी फक्त पिंजरा लावण्याचा सोपस्कार करतात त्यामुळे माणसांवर वारंवार होणाऱ्या हल्ल्याच्या घटनांमुळे वनखात्याला खरोखरच गांभीर्य नाही का? असा प्रश्न नागरीकांमधुन उपस्थित केला जात आहे
